వీక్లీ ఎక్స్‌పైరీ ఎఫెక్ట్.. చివరి గంటలో అమ్మకాల ఒత్తిడి.. డీలాపడిన స్టాక్ మార్కెట్

భారత స్టాక్ మార్కెట్లలో లాభాల జోరుకు గురువారం బ్రేక్ పడింది. రోజంతా తీవ్ర ఒడిదొడుకుల మధ్య సాగిన ట్రేడింగ్‌లో సూచీలు చివరికి స్వల్ప నష్టాలతో ముగిశాయి. వీక్లీ ఎక్స్‌పైరీ కావడంతో పాటు అమెరికా-భారత్ మధ్య వాణిజ్య ఒప్పందం కుదరవచ్చన్న ఆశల నేపథ్యంలో ఇన్వెస్టర్లు అప్రమత్తంగా వ్యవహరించారు. ట్రేడింగ్ చివరి గంటలో అమ్మకాల ఒత్తిడి పెరగడంతో ఉదయం వచ్చిన లాభాలు ఆవిరైపోయాయి.

ట్రేడింగ్ ముగిసే సమయానికి బీఎస్ఈ సెన్సెక్స్ 170.22 పాయింట్లు (0.2 శాతం) నష్టపోయి 83,239.7 వద్ద స్థిరపడింది. మరోవైపు, ఎన్ఎస్ఈ నిఫ్టీ 48.1 పాయింట్లు (0.19 శాతం) తగ్గి 25,405.3 వద్ద ముగిసింది. ఉదయం సెన్సెక్స్ ఒక దశలో 83,850 గరిష్ఠ స్థాయిని తాకినప్పటికీ, ఆ జోరును కొనసాగించలేకపోయింది.

సెక్టార్ల వారీగా చూస్తే, పీఎస్‌యూ బ్యాంకింగ్ సూచీ అత్యధికంగా 0.89 శాతం నష్టపోయింది. పంజాబ్ నేషనల్ బ్యాంక్, యూనియన్ బ్యాంక్ ఆఫ్ ఇండియా వంటి షేర్లలో అమ్మకాలు వెల్లువెత్తాయి. మెటల్, రియల్టీ, బ్యాంకింగ్, ఫైనాన్షియల్ సర్వీసెస్ రంగాలు కూడా నష్టాలను చవిచూశాయి. అయితే, మీడియా, ఆటో, ఫార్మా, హెల్త్‌కేర్, ఎఫ్‌ఎంసీజీ రంగాల షేర్లకు కొనుగోళ్ల మద్దతు లభించడంతో మార్కెట్లు భారీ పతనం నుంచి తప్పించుకున్నాయి. సెన్సెక్స్‌లో కోటక్ మహీంద్రా బ్యాంక్, బజాజ్ ఫిన్‌సర్వ్, ఎస్‌బీఐ షేర్లు నష్టపోగా.. మారుతీ సుజుకి, ఇన్ఫోసిస్, ఎన్‌టీపీసీ, ఏషియన్ పెయింట్స్ షేర్లు లాభపడ్డాయి.

మరోవైపు, డాలర్‌తో పోలిస్తే రూపాయి మారకం విలువ నెల రోజుల గరిష్ఠ స్థాయికి బలపడింది. విదేశీ పెట్టుబడులు పెరగవచ్చనే అంచనాలు, వాణిజ్య ఒప్పందంపై సానుకూల సంకేతాలు రూపాయికి బలాన్నిచ్చాయి. సమీప భవిష్యత్తులో డాలర్-రూపాయి మారకం విలువ 84.95 వద్ద మద్దతును, 85.70 వద్ద నిరోధాన్ని ఎదుర్కోవచ్చని నిపుణులు అంచనా వేస్తున్నారు.